Üower de plattdütske Runne

In usen Vohein: „Traktoren und historische Landmaschinen Grönegau Buer e.V.“

hiäget man ßiet Dezember 1990 aule Treckers un Geschiee ude Landwirtschaft.

Dree Mannslüe, Bussmanns Walter, Grottendiecks Heinrich un Wesslers Werner,

de in dänn Vohein medmaket, keimen 1996 up dänn Gedanken, auk de plattdütske Sprauke tou pliägen. Et waß blautz de Frauge, wie man ßowat maken könne.

Dür Toufall dröipen wi Bohlen Willem, dormols eeste Vositzende vanne „Plattfoss“ de us forts Mout make un toußiär, us tougange tou helpen.

Naudem de Vohstand van usen Vohein jau seggt hadde, konne wi eeine „plattdütske Runne“ inrichten un interessierte Minsken inladen.

An’n 08. Sept. 1996 waß’t dänn ßowiet, ßonne gohe Stiege Lühe dröipen ßick in’n Voheinshuse un üöwerliärn, wie et wiedergauhn könne.

Bussmanns Walter ßoll dänn Spriäker maken un man woll ßick jeeiden drüdden Sunndagmuorden in’n Voheinshuse driäpen. Up Vohschlag van Bohlen Willem könne man ßick eein Thema vohniehrmen, woh olle Besöiker wat tou vohtellen können, dat häwwe nu oll 163 moll maket. Bi olle plattdütsken Runnen wäd Riemsel un Vohtellsel, auk van Besöker vohliäsen, Leeder sungen un af un tou Sketche spierlt.

In’n eesten Johr keimen wi med de Besöikertahlen nich ßo recht ude Stiehe, Sunndagmuorden nau de Kiäken waß woll nich de rechte Tiet. Af November 1997 lade wi nu Plattdütskfrünne üerntsen ümme 3 Uhe, auk ton Kaffe un Kouken in, dat gefällt de Besöiker woll, dänn dornau kreigen wi ümmer mähr Toulaup.

Sietdem kurmt jedes Moll ßo gout 50 – 60 Frünne vanne plattdütsken Sprauke un pliäget eein aulet Kulturgout.

Eein Trägerkreis van 13 Lühe kümp noh eeinmol innen Mounat touhaupe un maket ßick Gedanken, wat man tou denn eenzelnen Themen olles maken kann.

Use Frumslüe ßuorget dorfoh, dat ümmer de passende Kouken uppen Disk kümp.

Dormet olle Vohtellsel de Nauwelt erhaulen bliewet, bringet afwesselnt seß Lüe ud’n Trägerkreis olles tou Papiere. Olle Berichte wäd dänn in’n Lokaldeeil van’n „Meller Kreisblatt“ unner de Üöwerschrift „De plattdütske Runne votellt sick wat“ med eein passendet Beld afdrücket. Sau kürnt olle Lüe de nich mäh ßo gout uppe Beene ßind un nich kurmen kürnt, liäsen, wat in use plattdütsken Runne olles bekürt wäd.

Et wör schön, wänn wi de Sprauke an use Kinner un Enkel wiedergieben können,

de Meenung wöden auk de Rektoren an use Schoulen, blauts man hät dorfoh keine passenden Lährer un auk woll keine Tied. Af September 1999 gaff’t ower inne

„ Bürsken – Lienenschoule“ un auk inne „Eickener – Grundschoule“ eeine AG (plattdütske Arbäitsgemeinschaft). Unner de Leitung van Grottendiecks Heinrich hät eein paar Lühe uden Trägerkreis vohsocht, interessierten Schöilern de plattdütske Sprauke neiger tou bringen.

Ower noh teehn Johr waß de Beteiligung ßo wenig, dat wi dormed uphott ßind.

Et wör tou wünsken, wänn an ollen Schoulen de niederdütsken Sprauke van de toustännigen Kultusminister fördert wöden, dormed eein aulet Kulturgout nich ganz vohluoden geeht.

Tou use plattdütsken Runne driapet wi us jeeiden drüdden Sunndag in Monat

üerntsens ümm 3 Uhe un hiertou ßind us olle van Hatten willkurmen.

Bussmanns Walter

Spriäker vanne plattdütsken Runne

Eine Zeitreise in die Vergangenheit